Sllovenët zbusin papunësinë e Skenderajt

Sami Lushtaku, kryetar i Komunës së Skenderajt, thotë se projekti për Parkun Teknologjik do të prodhojë vende të reja të punës, me çka do të zbutet sadopak papunësia, kur dihet se ajo ndodhet në një shkallë të shumë e lartë. Do të hapen 33 biznese dhe 366 vende te reje të punës.

Skenderaj, 25 shtator – Tridhjetë e tri biznese, të huaja dhe vendore, do të hapen në Parkun Teknologjik, në zonën e ish Fabrikës së Municionit në Skenderaj, i cili do të ndërtohet me investim të kompanisë së njohur sllovene Tehnopolis të Celjes. Realizimi i këtij projekti pritet të përfundojë brenda 15 muajve dhe do të hapen 366 vende të reja të punës. Sami Lushtaku, kryetar i Komunës së Skenderajt, shprehet se projekti për Parkun Teknologjik do të prodhojë vende të reja të punës, me çka do të zbutet sadopak papunësia, kur dihet se ajo ndodhet në një shkallë të shumë e lartë. “Projekti për Parkun Teknologjik, i cili do të ndërtohet me financimin e Tehnopolisit të Sllovenisë do të prodhojë vende të reja të punës. Pasi që të përfundojë projekti dhe të vendosen bizneset është planifikuar të hapen 366 vende të reja të punës, që për ne ka vlerë të jashtëzakonshme, pasi që, siç dihet tashmë, shkalla e papunësisë në komunën e Skenderaj është më e larta në vend”, ka thënë kryetari Lushtaku, një ditë pas nënshkrimit të kontratës me përfaqësuesit e Tehnopolisit nga Celja e Sllovenisë. Sipas Ylber Morinës, drejtor i Drejtorisë për Urbanizëm dhe Mbrojtje të Ambientit për komunën e Skenderajt, bazuar në kontratë, sllovenët janë obliguar që brenda dy muajve ta hartojnë projektin detaj dhe të pajisen me leje të ndërtimit. “Sllovenët brenda 60 ditëve janë të obliguar që ta hartojnë projektin detaj dhe të pajisen me leje ndërtimore, ndërkohë që pas 30 ditëve do t’i fillojnë punët për ndërtimin e Parkut Teknologjik”, është shprehur të premten drejtori Morina, sipas të cilit Parku Teknologjik ka kapacitet për 33 biznese, kurse e tërë procedura e vendosjes se tyre do të zhvillohet përmes sllovenëve, gjë që, sipas Morinës, është pozitive për faktin se mendohet se do të vijnë biznese të jashtme me kapacitete të mëdha investimesh. Në këtë kuadër, sipas tij, edhe bizneset vendore do të mund të vendosen në Parkun Teknologjik. “E gjithë procedura e vendosjes së tyre shkon nëpërmes të sllovenëve, gjë që është pozitive, pasi që mendohet se do të vijnë biznese të jashtme ma kapacitete të mëdha investimesh. Por edhe bizneset vendore mund të vendosen në Parkun Teknologjik”, ka thënë drejtori i DUMA-s, Morina, duke njoftuar se bëhet fjalë për biznese prodhuese. Ai ka siguruar se bizneset do të kenë lehtësira për pesë vitet e para të zhvillimit të veprimtarisë së tyre, duke u liruar nga taksat komunale. Qëllim i Komunës së Skenderajt, sipas drejtorit Morina, është që të joshën investitorët e huaj, por edhe vendorë. Ai vlerëson se me funksionimin e Parkut, do të zbutet papunësia në komunën e Skenderajt, e cila sipas shënimeve në Zyrën Komunale të Punësimit, është 50 për qind.Jeton Rushiti

Borxhet e shpenzuesve per ujin e pijshem 627.375 euro

Ilaz Halili, drejtor i Ujesjellesit Rajonal, njesia ne Skenderaj, ka thënë së deri më tash kanë aplikuar vetem shkyqjet kolektive, ndërsa pas kremtes së Bajramit të Madh do të aplikohet edhe shkyqja individuale. "Gjatë shkyqjeve individuale do ta kërkojmë asistencën e policisë“, ka deklaruar Halili, sipas të cilit, Lagjja 1 dhe fshatrat Klinë e Ulët dhe Tërnafc kanë 226.577 euro, Lagjja 2 me fshatrat Klinë e Mesme, Braboniq dhe Koshtovë kanë 165.188 euro, Lagjja 3 me fshatrat Klinë e Epërme, Lagjja Jasharaj, Lagjja 6 dhe fshati Prekaz kanë 151.844 euro borxh. Sipas drejtorit, borxhi i bizneseve është 53.753 euro, kurse borxhi i institucioneve pubklike është 30.013 euro.

Ndihmohen të varfrit

Njëzet familje të varfra të komunës së Skenderajt janë ndihmuar me artikuj të ndyshëm ushqimor nga vëllezërit Avdullahu nga Vranidolli i Prishtinës, pronarë të Fabrikës së Drurit “Gaterri”. Vlera totale e ndihmës është 2 mijë euro, me të cilat janë siguruar për secilën familje nga 50 kilogram miell, një pako ushqimore, sheqer, vaj, detergjent, oriz, kripë, mish dhe çaj. Habib Avdullahu, pronar i firmës së njohur “Gaterri”, tha se, ndonëse edhe rajonet të tjera kanë shumë familje të varfra, kompania e tij është përcaktuar t’u ndihmojë drenicasve. “Ne jemi përcaktuar që t’i ndihmojmë të varfrit në Drenicë, ndonëse edhe në rajone tjera ka shumë familje me gjendje të rëndë sociale. Sikur të kishte mundësi t’i ndihmonim më shumë familje do të ishte shumë më mirë, por kaq ishin mundësitë tona”, tha ai, duke thirrur bizneset të tjera të ndjekin shembullin e fabrikës së drurit “Gaterri”. Aktiviteti humanitar i vëllezërve Abdullahu për familjet skamnore të komunës së Skenderajt kishte filluar që nga ditët e para të pasluftës, si në gjëra ushqimore, ashtu edhe ndërtimin e shtëpisë, e cila iu kishte ndërtuar një familjeje në fshatin Prekaz. Edhe Haxhi Rreci nga Llausha e Skenderaj, me qëndrim të përhershëm në Gjermani, ka ndihmuar edhe sivjet pesë familje me gjendje të rëndë ekonomike, ku secila prej tyre ka përfituar nga 30 euro.

Komuna e Skenderajt mban dëgjimin e dytë publik

Komuna e Skenderaj ka mbajtur të martën dëgjimin e dytë publik për vitin 2009, në të cilën qytetarët e pranishëm janë njoftuar për prioritetet e komunës për tri vitet e ardhshme (2010/11/12), si dhe për projektet që janë duke u zhvilluar. Mehmet Berisha, drejtor i Drejtorisë për Ekonomi, Financa dhe Zhvillim ka përmendur projektet që do të zhvillohen gjatë vitit 2010, të cilat do të financohen nga buxheti komunal. Sipas tij janë gjithsej 28 projekte të ndryshme, vlera e të cilave arrin shumën 1,618,937 euro. Në tabelën e prezantuar, paraqiten: Plani zhvillimor Urbanistik për qytetin e Skenderaj (175 mijë euro), Rregullimi i infstrakturës në lagje e Dëshmorëve (300 mijë euro), trotuari në qendër të Runikut (39 mijë euro), rregullimi i rrugës në lagjen Qarkaj në Rakinicë (10 mijë euro), rrugët “Mujë Krasniqi” (42 mijë euro), “Miftar Bajraktari” (84 mijë), “Rasim Kiqina” (120.500 euro) dhe  “Likuiduesit e Shtabit” (212 mijë euro) dhe ujësjellësi në Prekaz,  Lubovec, Polac-Kryeshefc,Dashevc (73 mijë euro). Drejtori Berisha ka theksuar në Administratë do të investohen 34 mijë euro, me cilat do të ndërtohen zyrat e ofiqarit lokal dhe blerja e pajisjeve kompjuterike, në fushën e gjeodezisë do të shpenzohen 75 mijë euro, me të cilat parashihet eksproprijimi i tokës, incizimi i terrenit dhe blerja e kompjuterëve. Për Drejtorinë e Kulturës, Rinisë dhe Sporteve janë ndarë 62 mijë euro, me të cilat do të zhvillohen këto projekte: rregullimi i mullinjve me ujë në Tushilë, Kopiliq dhe Kuqicë, pastaj pajisja me mjete të zorimit, përfundimi i Kullës së Ilaz Kodrës, pajisja me kompjuterë, dhe shërbime të tjera. Në arsim, sipas Berishës, do të investohen 120 mijë euro, po aq sa janë ndarë edhe për shëndetësinë. Është planifikuar që të bëhet rinovimi i ambulancave, blerja e pesë aparateve laboratorik, strehimi i të pastrehëve dhe pajisja me inventarë për administratë.  Berisha ka thënë se buxheti komunal për vitin 2010 do të jetë 6,866,454 euro, prej të cilave 4,130,539 euro janë për paga, 822,477 euro për shërbime dhe mallra, 156,500 për komunalitë, 138 mijë euro për subvencionie dhe 1,618,937 kapitalet. Ndërkaq, deri në vitin 2012 Komunën e Skenderajt ka planifikuar të investojë hiq më pak se 116,861,254 euro në gjitha fushat. “Janë një serë projektesh prioritare të komunës së Skenderajt, të cilat do të financohen nga Qeveria e Kosovës, donacione dhe forma të ndryshme”, ka thënë drejtori i DEF-it, Mehmet Berisha. Pjesëmarrësit e këtij dëgjimi në vazhdim kanë plotësuar formularët, përmes së cilëve kanë paraqitur kërkesa për investime në ambientet ku jetojnë. Disa nga ta, si, Haki Ramadani nga Plluzhina, Kaqusha Zabeli nga Rezalla, Marigona Lushtaku nga Prekazi dhe Petrit Shabani, kanë ngritur çështjen e mungesës së kanalizimit, ujësjellësit, rrugës, hapësirave sportive, kompjuterizimin e shkollave, etj. Siç tha drejtori Berisha, do të shqyrtohet mundësia e inkorporimit të propozimeve të qytetarëve në prioritetet zhvillimore të komunës. Ai tha se disa nga to që u parashtruan nga pjesëmarrësit e këtij dëgjimi, janë duke u zhvilluar gjatë këtij viti, apo do të zhvillohen në vitin e ardhshëm.16.09.2009  12:09 min

SHKOLLË MODERNE NË PREKAZ TË EPËRM

Për ndërtimin e saj MASHT-i ka investuar 1 milion e 90 mijë euro. Ministri Hoxhaj ka premtuar inaugurimin e dy kabineteve në Shkollën e Mesme të Ulët “Azem Bejta” në vitin e ardhshëm.
Prekaz, Skenderaj, 24 shtator – Viti i ri shkollor 2009/2010, për nxënësit e fshatrave Prekaz i Epërm dhe Mikushnicë të Komunës së Skenderajt, filloi të enjten, në godinën e re shkollore, trekatëshe, e cila u inaugurua në praninë e Jakup Krasniqit, kryetar i Parlamentit të Kosovës, Enver Hoxhës, ministër i Arsimit, Shkencës dhe Teknologjisë (MASHT), strukturave komunale të Skenderajt, nxënësve, mësuesve dhe fshatarëve, të cilët kishin organizuar gazmend me rastin e përurimit të Shkollës së Mesme të Ulët “Azem Bejta”. Për ndërtimin e kësaj shkolle e cila ka 4500 metra katrorë, 800 nxënës, 40 mësimdhënës dhe 10 punëtorë teknik, MASHT-i ka ndarë 1 milion e 90 mijë euro. Në fjalën e tij të rastit, kryetari i Parlamentit të Republikës së Kosovës, Jakup Krasniqi, ndër tjera thekoi: “Bashkëkombësit tanë, jo fortë moti sa herë ka qenë nevoja për të folur për këtë vend, për këtë tokë, ata kanë ditur të flasin dhe të na sjellin këtu ku jemi sot. Shumë lëvdata, për të mos thënë lëvdatat më të mëdha u shkojnë atyre brezave dhe atyre burrave që me jetën e tyre, me gjakun e tyre bënë që ne të ndërtojmë dhe ta ndryshojmë jetën tonë. Ky ndryshim i jetës sonë askund nuk shihet më mirë se këtu”. Krasniqi tha se ky objekt më së miri tregon ndryshimet e thella që kanë ndodhur në Kosovë, që ka ndodhur në Drenicë, në Prekazin e lavdive dhe të trimërive tradicionale. Ai porositi gjeneratat e reja që me guxim dhe vendosmëri të marrin dije të reja, në mënyrë që ta çojnë vendin përpara. Ndërkaq, ministri Hoxhaj tha se Qeveria e Kosovës çdo ditë është duke bërë përurime të shkollave të reja anekënd Kosovës, ndërsa është duke bërë përpjekje maksimale që ta ndërtojë një sistem të ri arsimor. “Ne si qeveri e Kosovës, çdo ditë bëjmë përurimin e shkollave të reja anekënd Kosovës, meqë jemi duke bërë përpjekje maksimale që ta ndërtojmë një sistem të ri arsimor. Mirëpo përurimi i kësaj shkolle në Prekaz, në këtë vend të veçantë, është përurim i veçantë jo vetëm për këtë fshat, jo vetëm për këtë komunë, por për Kosovën dhe për gjithë qytetarët e saj”, ka thënë i pari i MASHT-it. Ai ka theksuar se nga ky vend ka lindur liria e Kosovës, dhe liria ka lindur në zemrat dhe mendjet e banorëve të Prekazit. Me ndërtimin e kësaj shkolle të re, shtoi ministri, dhe nga ky vend do të lind fuqia e ardhshme e Kosovës, e cila fuqi bazohet në dituri, në arsim dhe zhvillim ekonomik. “Jemi në një vend i cili çdo herë ka frymëzuar Kosovën dhe mbarë shqiptarët në Ballkan për trimëri të tij. Jemi në një vend, i cili është shquar me kullat e tij, në një vend, i cili në të ardhmen do të shquhet me shkollën e tij të re dhe me kuadro të reja të arsimuara”, shtoi ministri Hoxhaj, duke kërkuar nga mësimdhënësit dhe nxënësit të fokusohen në një mësim i cili bazohet në parim: Të mësojmë për të ditur, mësojmë për të vepruar, mësojmë për ta ndryshuar vetveten tonë, të mësojmë për ta ndryshuar Kosovën, ndërsa ndryshimi i Kosovës, liria e Kosovës pikërisht ka buruar nga ky vend. Ministri ka premtuar se në vitin 2010 do të inaugurohen dy kabinete të reja të teknologjisë informative në Shkollën “Azem Bejta” në Prekaz. Ndërkaq, kryetari i Komunës së Skenderajt, Sami Lushtaku, duke fol për kohërat e këqija nëpër të cilat ka kaluar vendi ynë, tha se t’u hapësh para lufte shkolla shqiptarëve konsiderohej gjë e rrezikshme nga regjimet e huaja, prandaj gjenerata të tëra nuk reshtën së kërkuari, krahas lirisë edhe shkollimin në gjuhen amtare. “Falë përpjekjeve shekullore të brezave të tërë, falë gjakut të derdhur për liri, ky brez më në fund arriti ta ketë shtetin e vet të pavarur, të ndërtojmë shkolla, spitale, fabrika dhe rrugë”, tha kreu i Skenderajt, duke shtuar se përurimi kësaj shkolle, e cila mban emrin e një simboli të vërtetë të luftës dhe qëndresës për liri, është gëzim i madh për të gjithë. Në Prekazin e kullave të qëndresës, siç tha Lushtaku, sot shquhet objekti modern i shkollës, i cili do të rrezatojë dije, kulturë e edukim. Ky objekt bashkëkohor i shkollës do të ofrojë më shumë mundësi për mësim, që niveli i edukimit të ngritet në nivel të dëshiruar. Kryetari Lushtaku ka uruar që nga kjo shkollë të dalin nxënës të denjë për universitet e të bëhen kuadro të dobishëm për atdheun. Një historik të shkurtër të shkollës në Prekaz e paraqiti drejtori Nezir Rama, i cili tha se themelet e para të shkollës fillore “Azem Bejta” në Prekaz datojnë që nga viti 1927, me një numër relativisht të vogël të nxënësve, i cili kohë pas kohe rritej. “Nga kjo vatër e arsimit kanë dalë shumë gjenerata, të profileve të ndryshme, si mësues, mjek, inxhinierë, doktor shkence, por edhe figura të rëndësishme të historisë tonë kombëtare, si Adem Jashari, Ilaz Kodra, Tahir Mehaj, etj”, tha drejtori i shkollës “Azem Bejta”. Ai përmendi edhe gjeneratën e mësuesve që kanë dhënë mësim në këtë shkollë, ndër të cilët ishte Shaban Jashari, që u largua nga UDB-ja jugosllave nga procesi mësimor, për shkak të ideve të tij patriotike. “Shkolla jonë numëron rreth 800 nxënës të shpërndarë në 30 paralele, për edukimin e të cilëve kujdesën 40 mësimdhënës dhe 10 punëtorë teknikë dhe administrativ. Shkolla e vjetër nuk ka plotësuar as për së afërmi nevojat dhe kushtet e domosdoshme higjeno-teknike dhe as për një mësim cilësor dhe bashkëkohor. Me ndërtimin e kësaj shkolle të re, do të bëhet një kthesë me sigurimin e cilësisë dhe arsimimit të duhur të nxënësve,  dhe për këtë meritat i ka Qeveria e Kosovës dhe Ministria e Arsimit”, tha drejtori Rama, i cili shtoi se drejtoria e shkollës dhe arsimtarët do të rrisin angazhimet e tyre edhe më tepër që këtë investim ta kthejnë në cilësi të mësimëdhënies dhe mësimnxënjës që është edhe prioritet i MASHT-it. Para prerjes se shiritit përurues, Drejtoria e Arsimit në Skenderaj i ndau mirënjohje ministrit Enver Hoxhaj për kontributin e tij në ndërtimin e shkollës, si dhe kompanisë “R&Rukolli” e cila ka përfunduar ndërtimin e saj një muaj e gjysmë para afatit të paraparë. Ndërsa, për të prerë shiritin u ftuan kryeparlamentari Krasniqi, ministri Hoxhaj, kryetari Lushtaku dhe Luzlim Jashari, djali i komandantit legjendar të UÇK-së, Adem Jashari. Jeton Rushiti