Kombajnerët e Komunës së Skenderajt janë pajtuar me çmimin e përcaktuar nga Qeveria e Republikës së Kosovës, i cili do të jetë 80 euro për korrjen e një hektari, por kanë kërkuar që të mos shënojë ngritje çmimi i naftës.

Edhe në këtë komunë, si në gjithë vendin, do të zbatohet vendimi i ekzekutivit kosovar për çmimin e korrjes, si dhe subvencionimin e kombajnerëve, kurse autoritetet komunale të Skenderajt kanë nxjerr një rregullore të posaçme për fushatën e korrje-shirjeve, me anë të së cilës janë themeluar shtabi për korrje, komisioni për shikimin teknik të autokombajnave, është përcaktuar çmimi prej 80 eurove për hektarë, është premtuar subvencionimi i autokombajnerëve me njëmijë litra naftë, ndërsa për shkelësit e kësaj rregulloreje, përveç përjashtimit nga subvencionimi, janë paraparë gjoba e cila do të jetë nga 800 deri 1000 euro. Megjithatë, kombajnerët janë në pritje për të nisur së mbari fushatën e bereqetit të korrje shirjeve, sapo kushtet atmosferike të jenë përmirësuar, ku në gjithë territorin e komunës pritet të korren rreth 8 mijë. Zyrtarë të Drejtorisë së Bujqësisë në komunën e Skenderajt, kanë deklaruar se pronarët e autokombajnave janë pajtuar me çmimin e ri, mirëpo kanë kërcënuar se nuk do të korrin pa 100 euro për një hektar, po që se çmimi i naftës nuk pëson ulje, apo të mos ketë ngritje. Naser Gashi, zyrtar në Drejtorinë për Bujqësi, Pylltari dhe Zhvillim Rural, ka deklaruar se janë marrë të gjitha masat për fillimin e kësaj fushate dhe gjithçka është gati që ajo të nis, sapo të vërehen përmirësimet e para atmosferike. Sipas tij. gruri është pjekur, ndërkohë edhe kombajnerët janë në gjendje gatishmërie. “Ata janë duke pritur përfundimin e të reshurave që kanë filluar tash e disa ditë. Komuna e Skenderajt, vazhdimisht do të jetë në mbikëqyrje të fushatës së sivjetme ku për t'u korrur janë paraparë 7300 hektarë me grurë dhe 480 me elb vjeshte”, ka thënë Naser Gashi, zyrtar i DBPZHR-së në Skenderaj.

PD shpall fitoren e zgjedhjeve

Partia Demokratike para pak sekondash ka shpallur fitoren e saj në zgjedhjet parlamentare të së dielës. Në një prononcim për mediat, zëdhënësja e fushatës Majlinda Bregu ka deklaruar se tashmë është e qartë, që koalicioni i djathtë ka fituar zgjedhjet.

Ajo ka ftuar Komisionin Qendror të Zgjedhjeve dhe Komisionet Zonale të Administrimit të Zgjedhjeve, që të certifikojnë rezultatet. “Nuk ka asnjë dyshim se kjo mazhorancë do të qeverisë Shqipërinë. Në të gjitha përllogaritjet jemi të sigurt se kemi 71 mandate. Koalicioni që do të qeverisë Shqipërinë do të jetë koalicion stabël”, tha Bregu gjatë konferencës nga selia blu. Me këtë rast, ajo ka falënderuar të gjithë zgjedhësit shqiptarë që votuan për të djathtën.

Gashi: Spitalet ndërtohen pa kurrfarë standardi

“Nuk është sekret që spitalet në Kosovë ndërtohen pa asnjë kriter të standardeve të kohës”, ka thënë ministri i Shëndetësisë, Alush Gashi.

Në një punëtori me temën “Spitale të sigurta”, të cilat janë organizuar nga Organizata Botërore e Shëndetësisë, ministri Gashi ka porositur legjislativin e vendit që të nxjerrë ligje të nevojshme që edhe në Kosovë të bëhen ndërtime me standarde evropiane. Këshilltari i OBSH-së për Evropë, Gerald Rockentchub, ka thënë se siguria në spitale duhet të jetë prioritet politik i vendeve të Bashkimit Evropian dhe kjo çështje duhet të adresohet tek të gjitha shtetet si një domosdoshmëri që shtetet duhet ta plotësojnë për të ruajtur shëndetin e popullatës.

Serbët pezullojnë bllokadat në veri

Serbët e veriut kanë vendosur që t’i suspendojnë përkohësisht bllokimet e rrugëve që shpien kah dy pikat kufitare mes Kosovës e Serbisë. Ata vendosën që një herë në javë të vihen bllokada 24 orëshe të këtyre rrugëve, si kundërshtim i masave të EULEX-it.

Ky vendim pasoi një takim të përfaqësuesve të komunave me shumicë serbe në veri, atyre të Mitrovicës, Zubin Potokut, Zveçanit dhe Leposaviqit, të cilat nuk i binden sistemit legal të Kosovës. Sidoqoftë, aty është vendosur po ashtu që të vihen bllokada selektive të rrugëve një herë në javë, si kundërshtim i masave të EULEX-it për kontrollin e kalimeve kufitare të njerëzve dhe mallrave. Javën e kaluar, edhe ministri serb për Kosovën, Goran Bogdanoviq, kishte kërkuar nga serbët t’i suspendojnë bllokimet e rrugëve, mirëpo ai ishte kundërshtuar ashpër nga serbët lokalë dhe strukturat paralele serbe.
Masat e EULEX-it në pikat kufitare Kosovë – Serbi në pjesën veriore kanë të bëjnë vetëm me kontrollin e hyrjeve nga Serbia, ku përfshihen fotokopjet e kartave të njoftimit të njerëzve dhe regjistrimi dhe vlerësimi i mallrave që hyjnë nga Serbia në Kosovë. Këto masa nuk nënkuptojnë edhe pagesat doganore, siç aplikohen në pikat tjera kufitare. /REL/